स्टँडअप कॉमेडियन Kunal Kamra पुन्हा एकदा वादाच्या केंद्रस्थानी आला आहे. यावेळी त्याने आपल्या स्टॅन्डअप शोमध्ये महाराष्ट्राचे उपमुख्यमंत्री एकनाथ शिंदे यांच्यावर एक कविता सादर केली. या कवितेचा विषय एकनाथ शिंदे यांच्या राजकीय निर्णयांवर आणि शिवसेनेतून भाजपसोबत युती करण्यावर होता. कामराच्या या कवितेमुळे महाराष्ट्राच्या राजकीय वर्तुळात खळबळ उडाली आहे. कुणाल कामराने 23 मार्च 2025 रोजी ‘नया भारत – अ कॉमेडी स्पेशल’ या शोमध्ये आपली कविता सादर केली. या कवितेत त्याने शिंदे यांच्यावर तीव्र टीका करत त्यांना “गद्दार” असे संबोधले आहे. कविता सादर करतांना त्याने महाराष्ट्रातील 2022 च्या राजकीय घडामोडींवर भाष्य केले, जेव्हा शिंदे यांनी शिवसेनेतून बंडखोरी करून भाजपसोबत हातमिळवणी केली आणि मुख्यमंत्रीपद स्वीकारले. कामरा हा त्याच्या तिखट आणि बिनधास्त राजकीय व्यंगासाठी ओळखला जातो. त्याने याआधी देखील अनेक राजकीय नेत्यांवर आपल्या कॉमेडीच्या माध्यमातून टीका केली आहे. सोशल मीडियावर त्याचे लाखो फॉलोअर्स आहेत आणि त्याच्या व्हिडिओंना मोठा प्रतिसाद मिळतो. कामरा हा आपल्या “Shut Up Ya Kunal” या यूट्यूब पॉडकास्टसाठी देखील प्रसिद्ध आहे. त्यात राजकीय नेत्यांशी गप्पा मारताना तो अनौपचारिक शैलीत चर्चेस भाग घेतो. कामरा हे अनेकदा आपल्या सोशल मीडिया पोस्टसाठी वादात ओढले जातात. 2018 मध्ये त्यांच्या काही ट्विट्समुळे वाद निर्माण झाला होता, त्यानंतर त्यांनी आपले ट्विटर अकाउंट डिलीट केले होते. तसेच, 2019 मध्ये त्यांना कार्यक्रम उधळण्याच्या धमक्या दिल्या गेल्या होत्या. यावेळी कामरा याच्या कवितेने शिंदे गटाला चांगलेच संतप्त केले आहे. शिवसैनिकांनी त्याच्या स्टुडिओमध्ये जाऊन तोडफोड केली आहे. या घटनेचा व्हिडिओ सोशल मीडियावर व्हायरल झाला आहे, ज्यात शिवसैनिक खुर्च्या, टेबल आणि लाइट्स तोडताना दिसत आहेत. दुसरीकडे, ठाकरे गटाने या कवितेचे स्वागत केले आहे. संजय राऊत यांनी कामराच्या कवितेला “कमाल” असे म्हटले असून शिंदे यांच्याविरुद्धच्या भावना व्यक्त केल्या आहेत. ठाकरे गटाचे म्हणणे आहे की, शिंदे यांनी शिवसेनेची मूलभूत विचारधारा आणि बाळासाहेब ठाकरे यांचा वारसा सोडून सत्तेसाठी भाजपशी हातमिळवणी केली. कुणाल कामराची कविता केवळ एक व्यंग्य न राहता महाराष्ट्राच्या राजकारणातील ठाकरे आणि शिंदे गटांमधील संघर्षाला नवे वळण देणारी ठरली आहे. एकीकडे शिंदे गट आक्रमकपणे कारवाईची मागणी करत आहे, तर ठाकरे गटाने या कवितेचा वापर शिंदे यांच्याविरुद्ध प्रचारासाठी सुरू केला आहे. शिंदे गटाने कुणाल कामराविरोधात गुन्हा दाखल करण्याची मागणी केली असून पोलिसांनी या प्रकरणाची चौकशी सुरू केली आहे. कामरावर मानहानी किंवा प्रक्षोभक वक्तव्य केल्याचा आरोप ठेवला जाऊ शकतो. मात्र, कामराने आपल्या X हॅण्डलवरून संविधानाच्या प्रतीसोबतचा फोटो टाकत पुढे जाण्याचा एकमेव मार्ग आहे, असे म्हटले आहे. यापूर्वीच्या वादांप्रमाणे तो आपल्या मतांवर ठाम राहतो की माफी मागतो, हे पाहणे महत्त्वाचे ठरणार आहे.
