बॉलिवूड आणि साऊथ सिनेमात मोठी ओळख बनवणाऱ्या अभिनेत्री श्रेया गुप्ताने अलीकडेच दिलेल्या एका मुलाखतीत तिच्या खासगी आयुष्यातील एक धक्कादायक अनुभव शेअर केला आहे. रजनीकांत आणि सलमान खानसोबत काम करणाऱ्या श्रेयाने सांगितले की, तिला चेन्नईमध्ये कास्टिंग काउचचा सामना करावा लागला होता.
ती म्हणाली, “2014 साली मी एका दिग्दर्शकाच्या ऑफिसमध्ये ऑडिशनसाठी गेले होते. तो म्हणाला, ‘माझ्या मांडीवर बस आणि सीन दाखव.’ मी खूप घाबरले. आईसोबत गेले होते, पण तरीही अस्वस्थ झाले. मी तिथून पळून आले.”
तिच्या मते, अशा अनुभवांमुळे तिने मुंबईत नशीब आजमावण्याचा निर्णय घेतला. “मुंबईत मला कधीच असं वागणूक मिळाली नाही,” असे ती म्हणाली. तिने साऊथ इंडस्ट्रीमध्ये परिस्थिती आता सुधारल्याचेही स्पष्ट केले.
श्रेयाच्या या अनुभवामुळे पुन्हा एकदा कास्टिंग काउचचा विषय चर्चेत आला आहे. अनेक अभिनेत्री आजही अशा घटनांचा सामना करत आहेत, पण आता त्या धाडसाने बोलू लागल्या आहेत — हीच एक सकारात्मक गोष्ट आहे.
