Disha Salian मृत्यू प्रकरण, ज्यामध्ये सुशांत सिंग राजपूतची माजी मॅनेजर दिशा सालियन यांचा मृत्यू ८ जून २०२० रोजी झाला, पुन्हा एकदा चर्चेचा विषय बनला आहे. दिशा सालियनच्या वडिलांनी, सतीश सालियन यांनी मुंबई उच्च न्यायालयात याचिका दाखल करत सीबीआयच्या माध्यमातून चौकशी करण्याची मागणी केली आहे. सतीश सालियन आता मृत्यूच्या बाबतीत हत्या झाल्याचा गंभीर आरोप करत आहेत.
८ जून २०२० च्या रात्री नेमके काय घडले?
दिशा सालियनच्या मित्राने एका व्हॉट्सऍप ग्रुपवर त्या रात्री घडलेला घटनाक्रम शेअर केला होता. ८ जून २०२० रोजी दिशा सालियनच्या घरात तिच्या मित्रांसह आणि प्रियकरासोबत पार्टी सुरू होती. पार्टीत दिशा मद्यपान करत होती आणि ती तिच्या करिअरवर निराश होती, अशी माहिती दिली गेली आहे. दिशा वारंवार म्हणत होती, “माझ्या कोणालाही काळजी नाही,” असे ती मित्रांना सांगत होती. काही वेळाने ती अचानक तिच्या खोलीत गेली आणि दरवाजा बंद केला. मित्रांनी आणि प्रियकराने दरवाजा ठोठावला, परंतु प्रतिसाद न मिळाल्यामुळे त्यानी दरवाजा तोडला. तेव्हा दिशा बाल्कनीतून खाली पडलेली दिसली. त्यानंतर मित्रांनी तातडीने दिशाला रुग्णालयात दाखल केले, पण त्यावेळी डॉक्टरांनी तिचा मृत्यू झाला असल्याचे सांगितले.
दिशाच्या मृत्यूचा सुशांत सिंह राजपूतच्या आत्महत्येशी संबंध?
सुशांत सिंग राजपूतच्या आत्महत्या झाल्यानंतर काही लोकांनी दिशा सालियनच्या मृत्यूचे सुशांतच्या मृत्यूशी जोडले. भाजपाचे नेते नारायण राणे यांनी असा आरोप केला होता की दिशा सालियनवर बलात्कार झाला आणि तिचा खून करण्यात आला. दिशाने सुशांतला या अत्याचाराची माहिती दिली होती, असेही ते म्हणाले. त्यानंतर सुशांतला धमक्या दिल्या जात होत्या, असे सांगितले गेले. १३ जून २०२० रोजी सुशांत सिंग राजपूतच्या मृत्यूमुळे या दोन घटनांचा संबंध जोडला गेला.
तपास आणि नवीन घडामोडी
२०२१ मध्ये पोलिसांनी तपास पूर्ण करत सांगितले की या प्रकरणात कोणतीही संशयास्पद बाब सापडलेली नाही. त्यानंतर, डिसेंबर २०२३ मध्ये महाराष्ट्र सरकारने तीन सदस्यांची एसआयटी स्थापन करून या प्रकरणाची पुन्हा चौकशी करण्याचा निर्णय घेतला होता. परंतु, एसआयटी अहवाल अद्याप राज्य सरकारला मिळालेला नाही.
पोलिसांनी केलेल्या तपासणीत दिशा राहत असलेल्या इमारतीच्या सीसीटीव्ही फुटेज तपासलेल्या. त्यात काही वेगळी बाब समोर आलेली नाही. त्याच रात्री दिशा केवळ एकदाच इमारतीबाहेर बाहेर आली होती, आणि ती पार्सल घेण्यासाठी खाली गेली होती. तसेच, ती गर्भवती असल्याचा दावा उत्तरीय तपासणीत खोडला गेला होता.
